ദാ,ഇപ്പൊ നമ്മുടെ അബ്ദുല്ലക്കുട്ടിയും

 സരിതകേരളത്തില്‍ ഇപ്പോള്‍ നമ്മുടെ അബ്ദുല്ലക്കുട്ടിയും സജീവമായെന്ന വാര്‍ത്തയാണ് തെരഞ്ഞെടുപ്പ് വാര്‍ത്തകളെ പിന്നിലാക്കിക്കൊണ്ട് എന്റെ ചെവിയിലെത്തിയത്. സരിതയെക്കുറിച്ചുള്ള ഏതു വാര്‍ത്തയും ഇപ്പോള്‍ ചെവിക്ക് പുത്തരിയല്ലാതായിരിക്കുന്നു. എങ്കിലും ഈ വാര്‍ത്ത‍ കേള്‍ക്കുമ്പോള്‍ ചെറിയൊരു അസ്വസ്ഥത തോന്നി. ശ്രീ. അബ്ദുള്ളക്കുട്ടിയെ എനിക്ക് നേരത്തെ പരിചയമുണ്ട് എന്നതായിരിക്കാം കാരണം. അദ്ദേഹം എം.പി.ആകുന്നതിനും വര്‍ഷങ്ങള്‍ക്ക് മുമ്പ് വളരാന്‍ വെമ്പുന്നൊരു നേതാവായിട്ടാണ് എനിക്ക് അദ്ദേഹത്തെ പരിചയപ്പെട്ടപ്പോള്‍ തോന്നിയത്. കാവുമ്പായി രക്തസാക്ഷിദിനത്തില്‍  പരിപാടിയില്‍ പങ്കെടുക്കാനെത്തിയതായിരുന്നു അന്നദ്ദേഹം. ഇളയ സഹോദരന്‍ ആര്‍കിടെക്റ്റ് മധുകുമാറിനൊപ്പം വീട്ടിലെത്തിയ സരസനും ഊര്‍ജ്ജസ്വലനുമായ ചെറുപ്പക്കാരനെ നന്നേ ബോധിച്ചു.  മലയാളസാഹിത്യം ആണ് അദ്ദേഹം പഠിച്ചത് എന്നറിഞ്ഞപ്പോള്‍ കൂടുതലിഷ്ടം തോന്നി. ഒരേ തൂവല്‍ പക്ഷികളോടുള്ള സ്നേഹം എന്ന്‍ വേണമെങ്കില്‍ പറയാം.
അധികം വൈകുന്നതിനുമുമ്പ് അദ്ദേഹം ഇടതുപക്ഷത്തിന്റെ അത്ഭുതക്കുട്ടിയാകുന്ന കാഴ്ച യും ആസ്വദിച്ചു. രണ്ടാംവട്ടവും കടന്ന് മൂന്നാംവട്ടമിനിയില്ലെന്ന് കണ്ടപ്പോള്‍ മറു കണ്ടം ചാടിയ മിടുക്കനെയാണ് പിന്നെ ഞാന്‍ കണ്ടത്. അപ്പോഴും എനിക്ക് തോന്നിയ സൌഹൃ ദത്തിന് മങ്ങലേറ്റില്ല. പല പരിപാടികളിലും കണ്ടുമുട്ടി.അപ്പോഴൊക്കെ സൗഹൃദം പുതു ക്കി. ഇപ്പോള്‍ അദ്ദേഹത്തിന്റെ തൊട്ടടുത്താണ് ഞാന്‍ താമസിക്കുന്നതും.
ഇപ്പോള്‍ സരിത പറയുന്നു 'അബ്ദുള്ളക്കുട്ടി തന്നെ ബലാത്സംഗം ചെയ്തു'എന്ന്. അത് സത്യമാണെങ്കില്‍ അതൊരിക്കലും എന്റെ മനസ്സാക്ഷിയുടെ നീതിപീഠത്തിന് ക്ഷമിക്കാ നാവാത്തതാണ്. അത് സരിത വെറുതെ പറയുന്നതാണോ എന്നൊന്നും എനിക്കറിയില്ല. എത്ര കള്ളത്തരം ചെയ്യുന്ന ആളായാലും അത്തരമൊരു കാര്യം പറയുമെന്ന് എനിക്ക് വിശ്വാസമില്ല. ആയിരം പേര്‍ക്കൊപ്പം കിടക്ക പങ്കിടുന്നവളായാലും അവളുടെ ഇഷ്ടമില്ലാതെ ഒരുത്തനും അവളുടെ ശരീരത്തില്‍ കൈവെക്കാന്‍ അവകാശമില്ല. അവളുടെ ശരീരം പുറമ്പോക്കല്ല.
അധികാരത്തിന്റെ ബലത്തിലാണ് ഇത്തരം കാര്യങ്ങള്‍ ചെയ്യാന്‍ തയ്യാറാവുന്നതെങ്കില്‍ സരിതയടക്കമുള്ള ജനം നല്‍കിയ അധികാരമാണെന്ന് ജനപ്രതിനിധികള്‍ മറക്കേണ്ട.അത് തിരിച്ചെടുക്കാനും ഞങ്ങള്‍ക്കറിയാം. ഏത് കൊലകൊമ്പനായാലും സ്ത്രീകളോട് അപമര്യാദയായി പെരുമാറുന്നവനെ ശിക്ഷിച്ചേ തീരൂ. ഒരു നിയമ പരിരക്ഷയും അത്തരക്കാര്‍ അര്‍ഹിക്കുന്നില്ല.