പോയ് വരൂ

ആയിളം താരുണ്യങ്ങൾ തൊട്ടുതലോടി

യന്നാദിത്യനൊരുവേള മറയാതെ.

ഇതൾവിരിഞ്ഞൂർന്നു വീണു നെറുകയി-

ലുമ്മവെച്ചനുഗ്രഹിക്കും പൂമരങ്ങൾ.

മഞ്ഞക്കുടന്നകൾ വാരിപ്പുതച്ചിതാ

മരതകച്ചാർത്തൊളിച്ചൊളിച്ചെത്തുന്നു.

ഇന്നോളമീമരച്ചോട്ടിലൊന്നിച്ചവർ

ഇനിയെന്നൊരാകാംക്ഷയിൽ മന്ദമായി

ചുറ്റിത്തിരിഞ്ഞിളംകാറ്റുചോദിക്കവേ.

ചുറ്റിലും നോക്കുന്നുണ്ടാർദ്രമാം കണ്ണുകൾ.

കരളിൽ നിറച്ചൊരായിരം കനവുകൾ

കവിളത്തു വിരിയിച്ച കുങ്കുമപ്പൂ.

സായന്തനത്തിന്റെ സൌവർണശോഭയ്ക്കു

സൌമ്യദീപ്തവർണം ചാലിച്ചു ചേർക്കുന്നു.

യാത്രാമൊഴിയേതുമോതാതെയിന്നിതാ

യാത്രയാക്കുന്നു മക്കളെ  പൂവാകകൾ.

പാറിപ്പറന്നു പ്രകാശം പരത്തുവാൻ

പോയ്‌ വരൂ നിങ്ങളീ വിദ്യാങ്കണത്തിലും.